මෙදා සැරේ පංසල් ආරෙන් මිදිච්ච වෙනස්ම ආකාරයක කථා වස්තුවක් කොටා බාන්නංය කියලා හිතා ගත්තාය.. හිතා ගත්තේ වෙනිං කවුරුවත් නොවේය... ඔයාලා හිතන්නේ ලෙනින් මොරායස් කියලද? ... එයා නං නෙවේය... හිතා ගත්තේ විජයා නම් මමය...
ලෙනින් මොරායස් කියන්නේ අපේ කාලයේ හිටපු රජ වැඩ්ඩෙක්ය.. අති දක්ෂ චිත්‍රපට නිර්මාණකරුවෙකි... හැදූ හැදූ එක බැඳ ගෙන දිව්වේය... හැම එකම බොක්ස් ඔෆීස්ය... එතුමාගේ ඇඩ් ඉවර කරන්නේ " වෙනින් කවුරුත් නොවේ... ලෙනින් මොරායස්" කියාය...නොදන්නා ඇත්තෝ ඉන්නවා නං දැන ගන්ඩය...
මේ කතා වස්තුව පංසලෙං පාසලට මාරු වෙන්නේය... ඒ උනාට ඩිරෙක්ට් ස්කූල්ම නෙවේය..
ඉස්කෝලෙ යන කාලෙ සිද්ධ වෙච්චි එකක්ය..
ඉස්කෝල කාලෙත් අග්ගිස්ස හරියෙ සීන් එකක්ය.. කියංඩ කතා නම් එමටය.. මතක් වෙන මතක් වෙන හැටියට කොටා බාන්නංය... ඕක ඉතිං අකාරාදී පිලිවෙලටම කොටාබාන්ඩය කියාලා රූල්ස් එකක් තියේ කියලයෑ...නැද්ද මං අහන්නේ..... ඒත් ඉතිං ඔය කාට හරි ඔව්වා ටික අකාරාදියෙංම ඕන කියලා හිතෙනවා නං ඒ හැටියෙං මට මතක් කොල්ලා දෙන්ඩය.. මං කොටා දමඤ්ඤංය.. නෝ පොබ්ලමය.....
හෙහ්...හෙහ්...හේඒඒඒ.. 😁😁😁😁😁😁
විජයා ඉගෙන ගත්තේ මිශ්ර පාඨශාලාවකය. ඇතුළු වෙන කාලයේ නං ඒක මහා විද්යාලයක්ය. අනේ ඉතිං කිසි ගින්නක් නැතුව කාලය ගතවුනාය... අපිත් හොඳට ඉගෙන ගත්තාය.. දඟ වැඩත් කළාය... ගුටිත් කෑවාය...ඉගෙනත් ගත්තාය... අපූරුවට තිබිච්චි අද්යාපන ක්ෂේත්රයට හිටි හැටියේම මහා කුණාටුවක් හැමුවාය..අද්යාපනය උඩු යටිකුරු වුනාය.. දරු කැළ හොල්මං උනාය.. අකුරු උගනිමිං උන් අප දේශපාලන හෙන්චයියලාගේ කුඹුරුඔල ඉඹුල් කිරිබත් ගෙඩියට ගොයම් පැළ හිටවීමට යොමු කෙරිණි... දන මන පූජිත සුජාත ධරණී... ලෝකෙං උතුං රට ලංකාවයි... සිරි ලංකාවයි වෙන කොට ගම්බද දුප්පත් විජයාලාගේ පරපුරේ දරු කැළ කුඹුරේ මඩ යටම තලා දැමීමේ අඩිතාලම මොනවට වැටී තිබුණාය.. අ.පො.ස.උසස් පෙල දක්වා පන්ති තිබිච්චි විජයාගේ ඉස්කෝලේ අටෙං කැපුණි... පාසලේ පංති අට වසරට සීමා කෙරිණි... මහා විද්යාලය කණිෂ්ඨ විද්යාලයක් බවට ඩීග්රේඩ් කෙරිණි... අසරණ විජයලා නවය වසරට ඇතුලුවීමට පාසලක් සොයා ගැනීමේ දුෂ්කර ක්රියාවට අවතීර්ණ වූවාහු, නේක විධ ගැහැට පිළිගත්තාහ..
වියළි කළාපයට රාජකීය මධ්ය මහා විද්යාලයක්... ටීවී නැති යුගයේ ජන හද බැන්දූ ගුවං විදුලිය ජන හද ඇන්දූවේ එලෙසය. පත්තර කාරයෝ ඊට එහාය... ඒ කාලයේ අද වගේ මාධ්යවේදීන් උන්නේ නැත. ඒත් ඇංදීමේ අඩුවක් වෙනසක් නං සිදු වූවේ නැත. දෙගොල්ල අත්වැල් බැඳගෙන අපූරුවට රජරට ගොවි ජනතාව අන්දා සතුටු වූහ.. වරදාන වරප්රසාද ආදියත් හිලව්වට ලැබෙන්ඩ නැතෑ.. කවුරු දන්නවැයි... අපි නං දන්නේ නැත... මී කඩන්නේ අහවල්මක්කටැයි කියලා කියා දෙන පිරුලක් එහෙමත් තියනවා නෙව..කිව්වා වගේම රාජකීය විද්දියාලයක් හැදුනාය... විජයාලාව ඉගෙන ගත්තු දුප්පත් ඉස්කෝලෙං එලියට ඇදලා දැමීමේ මංගල්ලෙට සමගාමීව රාජකීය ඉස්කෝලෙත් ආරම්භ කෙරෙන බවට කසුකුසු හැමතැනම... ගොවි දරුවන් රජ කරවන මංගල්ලය විදියට රේඩියෝ එකයි පත්තරයි පාරම් බෑවෙ...
නමය වසරට රාජකීයෙට ඇතුල් වෙන්ඩ විජයා ඇතුළු පංතියෙ හැමෝම හීන දැක්ක... රාජකීය විද්යාලෙට නිකංම ගන්නේ නැතිය.. ඇතුල්වීමේ විබාගයක් තියලා ඒකෙං පාස් වුනොත් විතරය ගන්නෙ කියල රාවයක් ගියා.. විජයාලගෙ ඉස්කෝලේ විදුහල්පති තුමා ඒක ඉස්තීරත් කෙරුවා... ඉස්තීර කොරලා නිකා හිටපියකො... රාජකීය ඇතුලත්වීමේ විභාගෙට පෙනී ඉන්ඩ කැමති ළමයින්ට ඉල්ලුම් පත්තරත් බෙදල දුන්න.. හීනෙ යාංතං බොඳවේගෙන ගියා උනත් ළමයි ගොඩක් ඉල්ලුම් පත්තර අරගත්තා... සමහරු නං ගත්තෙ නෑ.. එව්වට හේතු කාරණා නං එමට ඇති... මොකෝ අලුත් ඉස්කෝලෙ එසේ මෙසේ තැනක්යෑ..
විජයගේ හීනේ සඵල කර කර ගැනීමේ ආරම්භක පියවර හැටියට ගත්තා ඉල්ලුම් පත්තරේ..... සුරුස් ගාල දීව්ව ගෙදර.... විදුහල්පතිතුමා කිව්ව විදියට ඒක පුරවන්ඩ තාත්තට බාර දුන්නා....ඒක කිව්වේ ඉල්ලුම් පත්තරේ හොඳේ...පුරෝපු ඉල්ලුම් පත්තරේ පස්සෙන්ද උදේන්ම විදුහල්පති තුමා අතට පත් කරාපු මං තුමාට සැනසුම් සුසුමක් හෙලුනේ ඉබේටම වගේ... දැන් නම් රාජකීයෙට ඇතුලත් උනා වගේම හැගීමකින් මං තුමා වෙළිලා ගියා වගේ....අම්මේ දැනෙන සනීපෙ ..
විද්‍යාලයට ඇතුලත් වීම සඳහා යොමු කල අයදුම්පත ලැබුණු බවත් ඇතුලත්වීමේ පරීක්ෂණය පැවැත්වෙන දිනය යථා කාලයේදී දැනුම් දෙන බවත් සඳහන් කල ලිපියක් රාජකීය මැදි විදුහලෙන් ඒවා තිබුණි... ගණිතය සහ බුද්ධි පරීක්ෂණය යන විෂයයන් ට අදාලව ප්‍රශ්න පත්‍ර දෙකකට පෙනී සිටිය යුතු බවත් වැඩි දුරටත් සඳහන් කොට තිබුණි... වැඩ දෙකම විජයාට අවුලක් නැත... එකල ලක්දිව පල වූ සියලු පුවත්පත් මෙන්ම ගුවන් විදුලියද නොඅඩුව පරිශීලනය කල විජයාගේ පියාණන්ට පින් සිදුවන්නට විජයාගේ මීටරය සුපිරිම මට්ටමක පැවතිණ... ගනිතයේත් අවුලක් නැත එබැවින් ඇතුලත් වීමේ පරීක්ෂණය පිලිබඳ ගැටළුවක් වෙන කාට තිබුණත් විජයාට නම් තිබුණේ නැත... ටිකක් හිතට අරං පාඩම් වැඩ කටයුතු ටික කෙරුවොත් මැදි විදුහල් පරීක්ෂණයෙන් ජය ගැනීමේ අපහසුවක් විජයාට නම් පෙනෙන්නේ නැත... මෙතෙක් පෙනී සිටි හැම විභාගයක්ම සමත් වී සිටි විජයාට මේ පරීක්ෂණය ගැනත් බියක් දැනෙන්නේ නැත... පහේ සිස්සත්තෙට ලියන්නට විජයාට වරම් ලැබුනේ නැත... එයට තාත්තා අවසර දුන්නේ නැත ... සිස්සත්තේ පාස් වෙච්චි අයියාත් අක්කාත් දැනටමත් නේවාසිකව ඉගෙන ගන්නේ ගෙදරින් දුර බැහැර මැදි විදුහලක බැවින් විජයාත් ගෙදරින් පිට කර ගන්නට තාත්තාට උවමනා වුනේ නැත... එකත් ලිව්වා නම් විජයාත් අද අයියයි අක්කයි එක්ක සෙන්ට්‍රල් එකේය... තාත්තාට ඒ දුක, කාන්සිය හා පාළුව උහුලන්නට උවමනා වුනේ නැත... ඉතින් විජයා ගෙදරට කොටු විය...
ඔය අලුතෙන් අරිනවාය කියන සෙන්ට්‍රල් එකට ගෙදර ඉඳලා ඒ හැටි දුරකුත් නැත... බස් එකේ ආ ගිය හැකිය... එනිසා තාත්තාට ගැටළුවක් වෙන්නෙත් නැත... විභාගෙත් ෂේප් එකේ ගොඩ දා ගත හැකිය... ඒ ගැන බයක් ඇත්තෙම නැත... අනාගතය ගැන අලුත් බලාපොරොත්තු සමඟ කැටි වූ හීන් සතුටකින් හිත පිරී යන්නාක් සේ විජයාට දැනුණි... විභාගේ පාස් උනාම ඒ සතුට දෝරේ ගළා යනවා නිසැකය... විජයා තව ටිකක් දඟ දමා පාඩමට හිත යොමු කොළා....
විභාගෙට කලින් දවසේ හැන්දෑවේ අම්ම විජයාව එක්කරන් ගියා පන්සලට... මල් පහන් පූජා කොරල අහක් වෙලා බෝධියත් වැඳ පුදා ගෙන අහවර වුනාට පස්සෙන් පහු ලොකු හාමුදුරුවෝ සෙත් පිරිත් දේශනා කරලා විජයාට ආශිර්වාද කළා... මං තුමා හෙවත් විජේ කොලුවා දැන් ෆිටේ ෆිට්... පස්සෙන්දා පාන්දරින්ම අවදි වෙච්ච විජේ කොලුවා, දඩි බිඩි ගාලා ලේස්ති වෙලා, අම්මාටයි තාත්තාටයි වැඳලා හෙම දකුණු කකුල පෙරට තියලා ගෙදරින් පිට උනා... කලින් කතා කර ගත්තු ආකාරෙට කස්ටිය බස් ඉස්ටැන් එකේදී එකතු උනා... කෙල්ලෝ නම් කවුරුවත් නැහැ... මොකද දන්නවද ? අලුත් මැදි විදුහල මිශ්ර ඉස්කෝලයක් නෙමෙයි ... පිරිමි ළමයි විතරයි... පොඩි අව්ලකට තියෙන්නේ එච්චරයි ... විජයගේ හිතට පොඩි දුකකුත් නොදැනුණා නෙමේ... පන්තියේ කෙල්ලෙක් දෙන්නෙකුත් ඉන්ඩ ඕනේ... නැත්තන් ගතියක් නැහැ... එත් ඉතින් මක් කොරන්ඩද එන්නා සෙයියරදු කිව්වාලුනේ.... ඉතින් අපේ මොකෝ .
නියමිත වෙලාවට සෑහෙන්න කලියෙන් කෂ්ටිය මැදි විදුහලට ලඟා උනා... ගේට්ටුවේ ආරක්ෂක රාජකාරි කටයුතු හින්ද තරමක පෝලිමකුත් ඇති වෙලා තිබුණා... ඒ වුනාට වැඩි වෙලාවක් පෝලිමේ ලත වෙන්ඩ උනෙත් නැහැ... මුල ඉඳලම වැඩ කටයුතු හරි පිළිවෙලයි කියල විජයාට හිතුන... හැමෝම විභාග ශාලාවට ඇතුල් වෙලා තම තමන්ට ලැබිලා තිබුණු විභාග අංකයට අදාළ ආසනේ හොයා ගෙන වාඩි උනා... හැමෝම නොඉවසිල්ලෙන් ඉන්නා බවක් පෙනුනා... සමහරුන්ට දැම්මම දාඩියත් දාලා... විජයාට නං ගානක් වත් නැහැ. ෆිට් එකේ ඉන්නවා ....
ඔන්න එක පාරටම සීනුවක් නාද වෙන්න පටන් ගත්තා ... ඔක්කොමල්ලා ගැස්සිලා ගියා සීනු නාදෙට... ඇයි ඉතිං බලාපොරොත්තුවෙන් උන්නේ වෙන දෙයක් නෙව... කොලු නඩේ කාගෙ කාගේත් මූණු වල ලැජ්ජාව බේරෙනවා... කොරන්ඩ දෙයක් නැහැ ඒකට... එක්කෝ කලිං කියල සීනුව ගහන්ඩ ඕනේ... එච්චර වෙලා ඒ විදියට ඉන්ඩ උනේ නැහැ... විබාග පරීක්ෂක වරු ශාලාවට ඇතුළු උනා... කව්රුත් සීරුවෙන්... මීක් සද්දයක් නැහැ දැන්නං... විභාග අපේක්ෂකයන් පිළිපැදිය යුතු දේවල්, නීතිරීති එහෙම විස්තර කරපු කතාව කෙරුවේ විදුහල්පති තුමා වෙන්ඩ ඇති මගෙ හිතේ, විජයාට හිතුනා... ඉන් පස්සේ විභාගේ ආරම්භ උනා... මුලින්ම බුද්ධි පරීක්ෂණ ප්‍රශ්න පත්තරේ... විජයා නිවී හැනහිල්ලේ කියෙව්වා පේපරේ... අවුලක් නං නෑ වගේ... කොහොමින් හරි නියමිත වෙලාවටත් කලියෙන් ලියලා ඉවර කෙරුවා... හිතට ෆිට් එකේ උපරිමේ ... කඩයිමෙන් බාගයක් දැනටමත් ගොඩ ගිහින් කියල විජයාට දැනුණා... ඊළඟට විනාඩි පහළොවක විවේක කාලේ... කට්ටියම ගිහිල්ලා මුත්තරා බරවල් වලිං හෙම නිදහස් වෙලා කාරිය කැන්ටිමේ පයිප්පෙන් වතුර එහෙම බීල ආයෙමත් විභාග ශාලාවට ඇතුල් උනේ හොඳ හුස්මක් කටක් කාරිය අරගෙන... ඊළඟට පිරිනැමෙන ගණිත ප්‍රශ්න පත්තරේ පිළිගන්ඩ කව්රු කව්රුත් සැදී පැහැදී බලාගෙන උන්නා...
පේපර් එක ගත්තු විජයා ඒක කියවන්ඩ පටන් ගත්තා... කොලුවා ගේ ඇස් ගෙඩි දෙක ඩිංග ඩිංග උඩ යන්ඩ පටන් ගත්තා... නළල රැලි වැටෙනවා මහා හුළඟට වැවේ දිය රැලි උඩ යන්නා වාගේ... නළලේ වටේට දාඩිය බින්දු බින්දු මතු වෙනවා... ඔලුවත් කැරකෙනවා ... අප්පට සිරි .... ඔක්කොම මැට්‍රික්.... කව්ද එව්වා දන්නේ ..? චක්කරයක් වත් දන්නේ නැහැ කව්රුවත්... හැම පොතක පතකම තියෙන්නේ යාර අඩි අඟල් චක්කරේ... බ්‍රිතාන්‍ය ඒකක කියන එව්වාය... මෙට්‍රික් වගුවක් නං ජීවිතේට දැකලා නැත ... අලිම අලි හුට්ටප්පරයක්ය මේ සිද්ධ වෙලා තියෙන්නේ.. මෙට්‍රික් එකක් ඉස්කෝලෙදි වත් උගන්නලා නැත ... විජයාලාගේ ගැන්සියේ කව්රුවත් මෙට්‍රික් අහලා නැත... ඉදිරියේදී ලංකාවේ මිනුම් ක්‍රම මෙට්‍රික් ක්‍රමයට හරවන්නට පිඹුරු පත් සකසනවාය කියලා පත්තරේ නං තිබුණාය ... එකත් නිකං ආරංචියක් විතරය... ඒ උනාට එව්වා තාම ක්‍රියාත්මක කෙරුනේ නැත ... පනතක් වත් තවම පාර්ලිමේන්තුවට ගෙනවිත් නැත ... වගුවක් වත් හැදුවාද දන්නෙත් නැත... සිංහලෙන් නැතුව ඉංග්‍රීසි වගු තිබ්බොත් විජයාලාට බලු වලිගෙ බැන්ද මී වද ගානය... අහවල් පොරෝජනයක්ය එව්වගෙන් ? යකෝ... අපි වතු කොට කොටා ඒක එකාගේ කුඹුරු ඔල ගොයං පැල හිටෝ හිටෝ ඉන්න අව්අස්සේ උගන්නලා අපට එව්වා මග හැරුනා වද්ද?.. කව්රු දන්නවද විජයාට හිතුනා... වෙච්චි වැරැද්දට එන්නා සේය්යරැදු කියලා කව්දෝ කිව්වලුය ... ඒක අහපු තව එකෙක් කිව්වලු අච්චු ලැබෙවාය කියලා.. එව්වා ගෙන් විජයාට දැන් ඇති වැඩක් නැත... මොන ජිල්මාල් එකක් දමා හෝ ගණන් ටික හැදිය යුතුය ... නැත්තං විජයා අනාථය වැඩේ කොට උඩ යනවාය ... විජයාගේ අනාගත හීනය බොඳ වෙනවාය... දැන් මේකට කල යුත්තේ කුමක්ද ? මේක බහුවරණයක් නං වැඩේ දෙයියන්ට බාර දී දෑස පියා ගෙන උත්තර ලකුණු කර ගත හැක ගණන් එක්ක ඒ සෙල්ලම් දමන්නට බැරිය අනික දෙයියොත් මෙට්‍රික් දන්නවාදැයි ෂුවර් නැත ම්ම්ම්ම්ම්ම් මාර ගින්නක්ය විජයාගේ ලය මඬල ඇතුලෙහි බුර බුරා නැග එන්නේ අසරණ විජයා කොලුවා දෑස පියා ගෙන අහස පොලොව ගැටලන්නට විය..යකා උගේ කම්මල ගෙනවිත් විජයාගේ හිස්කබල අස්සේ හයි කර ඉස්ටාට් කෙරුවේත් ඔය අව් අස්සේය .....
පට්ටාෂ් ..... අයිඩියාෂ් ....
ගණ දෙවියෝ ඇවිත් යකාගේ කම්මල වසා දමන ලදී.... විජයාට ගණ දෙවි සහාය ලැබී ඇති ලකුණු පහලවී තිබේ ... තෙල් බෝතලයේ මිලිලීටර් හත්සිය පනහක් අඩංගු වන්නේ යැයි ලේබලයේ සඳහන් කර තිබුන බව විජයා කොලුවාගේ මතකයට නැඟුනි... ගැළුමකට බෝතල් හයකි... ද්‍රව පිලිබඳ ගණිත වගුව දැන් සකසා ගත හැක... රාත්තලකට ග්‍රෑම් හාරසිය පනස් හතරකි... ඒකත් මොකක හරි ලේබලයක තිබුණා විජයා කොලුවාට මතක් විය ... වාසනාව විජයාගේ පැත්තේ විය යුතුය... ඒත් දුර මනින මෙට්‍රික් උන්නැහේ ගැන නං අදහසක් එන්නෙම නැත... ඔය මදැයි මොකුත්ම නැතුවාට වඩා මොනවා හරි තිබීමම වැදගත්ය... දැන් මේ චක්කර නිර්මාණය සමඟ ගණන් කීපයක් හදා ගත හැකිය ... යකාගේ කම්මල වසා දැමූ ගණ දෙවියෝ විජයාගේ ඉසේ මලක් පුබුදු කර සිටියේය ... වව්වාලයා... ඔය තියෙන්නේ නැති චක්කරේ... විජයා තමාම නිර්මාණය කර ගත් මෙට්‍රික් ගණිත වගුව උදව්වෙන් ගණිත ප්‍රශ්න පත්තරයේ ගැටළු විසඳන්නට පටන් ගත්තේය ... අවාසනාවට එම උත්සාහය විය යුතු පරිදිම අති දීර්ග ලෙස කාලය වැය වෙන්නක්ම විය... ඉතාම ඉක්මනින් කාලය ඉකුත් වීමෙන් පිලිතුරු පත්‍ර නැවත එකතු කිරීම ඇරඹුණු බැවින් එතැනින්ම විජයාගේ සිහින මාලිගාව බිඳ වැටී යන ලකුණු පහල විය...
ප්‍රතිඵල නිකුත් කෙරිණි...තැපෑලෙන් ගෙදරටම ප්‍රතිඵල එවා තිබුණි... බලාපොරොත්තු වූ පරිදිම විජයා විභාගයෙන් අසමත් ව තිබුණි... විජයාගේ නව සොයා ගැනීම ගැන නිසි අවධානයක් නං යොමු වී නොතිබුණි ... ඔහුගේ ගණිත වගුව හෝ එය උපයෝගී කර ගනිමින් විජයා දරණ ලද උත්සාහය ඇගයීමකින් තොරවම අධෝවාතයක් තරමට වත් නොසලකා බැහැර කර තිබුණි... විය යුතුව තිබූ පරිද්දෙන්ම විජයාගේ එකදු යහළුවෙකු හෝ සමත් ව තිබුනේද නැත... රාජකීය සිහින ඉන් නිමා විය... ඒ මත්තේ නැහිල්ල පසෙක ලූ විජයා සහ මිතුරු සංධානය තරමක් දුෂ්කර වුවද වෙනත් මහා විද්යාලයයකට ඇතුලත් වූයේ, එහි විදුහල්පති තුමාගේ කාරුණික භාවය නිසාමය...මේ මහා විද්‍යාලයද මිශ්ර පාසලක් වූ බැවින් කව්රුවත් කන්කෙඳිරි ගෑවේ නං නැත... එයින් උපරිම ඵල නෙලා ගත් විජයා කොලුවා සහ පිරිවර අ පො ස (සා/පෙ), (උ/පෙ ) සමත් වන්නා හූ මතු නොව විශ්ව විද්යාලය ට ද ඇතුළුවන්නාහු ගව්රව උපාධියෙන්ද පිදුම් ලබන්නට තරම් වාසනාවන්ත වූහ ... කෙළි පොඩිත්තියන් කීප පොළක්ම ද විජයාලගේ අඩි පාරේ විශ්ව විද්‍යාල ගත වී ජීවිතය ජය ගත්හ ...
No comments:
Post a Comment